An avan fanm kreyòl yo, Mondyal la posib pou pèp Ayisyen !

Apre kalifikasyon ekip nasyonal maskilen an te fèt nan lane 1974, epi ekip mwens pase 17 lane gason yo nan lane 2007 la, fwa sa a se tou pa ekip feminen u-20 an pou yo fè monte drapo ayisyen an sou sèn entènasyonal la kote yo pral patisipe nan mondyal feminen an. Gwo randevou sa ap fèt
nan peyi Lafrans soti 5 pou rive 24 out 2018.

Nan premye soti ekip ayisyèn nan nan faz poul yo, Ayiti te kale Trinidad 3 gòl a 2 (3-2). Apre sa yo te genyen Kostarika 3 a 2 tou avan yo te vin pèdi devan Kanada 4 gòl a 2 (4-2). Ayiti vin pran revanj li devan Kanada kote yo ofri yon biyè kalifikatif pou mondyal la, ki byen merite.

Seleksyon ayisyèn nan kalifye pou koup dimond U20 an kote yo te kale
Kanada yon gòl a zewo nan ti final ki te fèt jou dimanch ki te 28 janvye 2018 la nan estad Atoboldon Cuva nan peyi Trinidad. Sou yon gòl Chèle Jedi (Cherly Jeudi )te fè.

CONCACAF la te gen 3 plas ki te disponib pou mondyal mwens pase 20
lane yo. Grenadyè yo te oblije bay tout sa yo te konnen nan match sa a.
Sa nou tout te ka santi depi mach la te kòmanse, se te gwo motivasyon ki te genyen lakay medam yo.

Nerilya (Nerilia Mondesir) te byen bay Chèle pas la ki te nan bon pozisyon
pou mete balon an nan kan an. Jèn atakant la ki soti nan zòn Okap la mete
yon gwo chout avèk pye dwat li. Kote gadyèn kanadyèn la Tayle Fostè (Tyler Foster ) pa t ka fè anyen pou balon an. Se te nan disetyèm minit la sa te rive.

Grenadyè yo kenbe avantaj la (1-0) jistan premye mitan an fini. Avantaj sa
a pa t janm chanje jouktan match la te fini. Malgre kanadyèn yo te fè anpil
gwo aksyon men defans ayisyèn nan te byen solid, yo pa t pran gòl.

Nerilya Mondezi,Sous foto : Entènèt

Ayiti vin tounen premye peyi nan zòn karayib la ki nan nivo sa a. Kidonk Ayiti antre nan 16 peyi k ap pratike foutbòl fanm, se sa nou li sou paj Fesbouk (Facebook) Federasyon Foutbòl Ayisyen an. Se yon gwo bagay pou foutbol nan Karayib la. « Se yon gwo pari Ayiti reyisi». Se kòmantè sa a prezidan federasyon foutbòl ayisyen an, Dadou Janba (Dadou Jean-Bart ) te fè.

Se ak anpil kè kontan, anpil moun, enstitisyon fanmi t al resevwa Grenadyè nou yo nan Ayewopò Tousen Louvèti a. Akèy la pa t rete la sèlman. Chanm Sena a te fè ekip la kado yon chèk 25 mil dola ameriken. Prezidan Jovnèl Moyiz nan bò pa l, te fè ekip la anpil pwomès. Antouka gade pa boule je, an nou tann.

Jounal Bon Nouvèl wete chabo li, li koube l byen ba pou li di nou Medam,
Anavan Balon an won pou nou tou, Nou ka fè l ankò.

Wozilya Franswa

Share Button

Ou ka byen renmen sa yo tou

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *